Студиото „Ворнер Брос“ го објави официјалниот трејлер за „Том и Џери“, долгометражен хибриден анимиран филм што ќе внесе нов живот во култниот цртан филм на тимот Хана-Барбера.
Том и Џери ја започнаа својата кариера во MGM во раните 40-ти години на минатиот век, и се емитуваа до крајот на 50-тите. Со текот на годините станаа неизоставен дел од анимацијата, а авторите Вилијам Хана и Џозеф Барбера во периодот од 1943 до 1953 година се добитници на дури седум Оскари за епизодите “The Yankee Doodle Mouse”, “Mouse trouble”, “Quiet Please”, “The cat concerto”, “The little orphan”, “The two mouseketeers” и “Johan Mouse”. Последен пат ликовите на Том и Џери беа дел од филмски проект во далечната 1992-ра, со анимираниот филм насловен Tom and Jerry: The Movie.
Сега, преку нов забавен филм, Том и Џери се пренесени во Њујорк во 21 век. Трејлерот првично прикажува момент на примирје меѓу неуморното дуо, пред Том да го погоди камион (смислено дело на Џери). Потоа Џери си наоѓа дом во луксузен хотел, каде е планирано да се одржи „свадбата на векот“. Сакајќи да се ослободи од глушецот, менаџерот на хотелот најмува помошник во „ловењето“, кој всушност не е никој друг, туку Том. Секој што ги гледал Том и Џери знае дека мачорот ретко победува.
Видеото е носталгично и забавно - и за млади и за возрасни. Покрај анимираните мачки и глувци, во филмот се појавуваат и вистински луѓе - актерите Клои Морец, Мајкл Пена, Роб Делејни, Кен Јонг и Колин Џост. Сценариото е напишано од Кевин Костело, а во режија на Тим Стори, познат по филмовите „Fantastic Four“ и продолжението „Fantastic Four: Rise of the Silver Surfer“, a го снимаше и „Ride Along“.
Премиерата на филмот е предвидена за 5-ти март 2021 година.
